عارف ايه أغرب حاجة ممكن تحطك تحت ضغط و تفسد كل علاقاتك و بعديها ممكن تدمر حياتك.. هو إستمرار إنتظارك لأشياء أنت متخيل أنها لازم تحصل من ناس بيشاركوك جزء كبير من حياتك. و لما متحصلش تبدأ تعبر عن غضبك و حزنك و كمان رفضك للنوع ده من العلاقة و تبدأ حياتك تتحول لحياة مملة و كئيبة و طبعا انت شايف انهم هما السبب .. فتبدأ دون أن تشعر أنك تسقط كل احزانك عليهم كما لو كنت عاوز تنتقم منهم لأنهم افسدوا حياتك.. و طول الوقت بتوجه لهم اتهامات مباشرة أو غير مباشرة بأنهم مكانوش يستاهلوا كل الحب و الاهتمام اللي كان موجود .
انت في الحقيقة استسهلت و نسيت انك مش لوحدك محور الكون .. انت نسيت أنك كمان لازم تدي و انك علشان تلاقي مشاعر جميلة من حد انت بتحبه لازم يكون عندك حاجات قصادها ..مش بس انت اللي كويس و الناس مش بتقدر .. انت كمان كتير مش بتقدر و في الحقيقة الشعور ده أفسد عليك كل اللحظات الجميلة اللي كنت ممكن تلاقيها مع ناس بتحبهم لأنك كنت عايش في عالم افتراضى متخيل فيه انك البطل الوحيد لروايته.
إنت استريحت لفكرة انك مظلوم و انك اديت كتير ده مش حقيقي هو الحقيقة انك تقريبا بقيت عايش لنفسك و عاوز تاخد و بس ..
طبعا محدش يبقى عاوز يعترف انه فاشل.. و بيبقى عاوز يرمي أسباب فشله على اي طرف .. و هنا ده بيبقى الطريق الحقيقي للفشل . مش كل العلاقات في الدنيا تتفع فيها فكرة هات و خد . .. انا ضحكت لك يومين فأنت لازم تضحك لي يومين .. انا كنت لطيف معاك النهاردة فيبقى لازم تكون لطيف معايا بكرة. .. لأ.. العلاقات اخد و عطا بس مش بالمسطرة .. انا ممكن يكون عندي القدرة على العطاء النهاردة … و بكرة محتاجلك أو ممكن أكون محتاجلك شهور و معنديش حاجة اقدر اديهالك ..
متحسبوش علاقتكم بالناس بالمسطرة .. و اعرفوا أن اي فشل انت فيه و اي حزن انت بتعيشه انت السبب رقم واحد فيه … و لو عندك حد بتحبه أمسك فيه اوعى تسيبه.. و حاول تديه كل اللي تقدر عليه .. ماتحسبوهاش
العلاقات مش ١ + ١ طول ما قادر تدى إدى … هيبجى اليوم اللى إديته هيرجعلك و يترد لك … بس صفوا النيه