تامر حسني يرد على رسالة محمد سامي: صدقت موهبتك
رد المطرب تامر حسني، على رسالة المخرج محمد سامي والتي تضمنت كلاما في حق الأول ووصفه بصاحب فضل، مشيرا إلى أنه منحه فرصة في بداياته الفنية.
وعلق تامر على منشور سامي، وكتب: “يا سامي يا حبيبي يا ابن الناس الطيبين.. شكرًا من كل قلبي على كل حرف خارج من قلبك كتبته في حقي، خلتني أدمع يا سمسم، أولًا أنا صدقت موهبتك من وأنت صغير سنًا لإنك فعلا موهوب موهبة مش عادية وتاريخ نجاحاتك يشهد بكده، كنت عارف وأنا بقدمك إني بقدم مكسب حقيقي للصناعة ومن يوم ما سجلت رقمك على تليفوني وهو مكتوب سامي ابني، عشان كان إصراري على تقديمك كان بقلب أب مش صديق من سنك، أب مصدق في ابنه وعارف إن الناس مش هيدوله فرصة يطلع عشان سنه صغير”.
واستكمل: “والحمد لله برحلتك ورحلتي أثبتنا للدنيا إنها مش بالسن، لأ بالمجهود والتعب والشطارة والمذاكرة وأنت كل الصفات دي كانت فيك وأنا لوحدي اللي عارف، عشان كده صممت إن الدنيا كلها تعرف معايا حجم موهبتك الحقيقي، حتى أعمالي اللي من إخراجك ليها مكانة خاصة في قلوب الناس، مسلسل آدم، فيلم أهواك، فيلم تصبح على خير، ولسه إن شاء الله نجاحات كتير مستنيانا مع بعض، ربنا يوقفك يا حبيبي في كل شغلك اللي جاي وتكسر الدنيا وفي القمة زي عادتك”.
وأنهى تامر تعليقه: “يا محمد شكرًا تاني على البوست الصادق ده شكرًا يا أصيل يا محترم، ربنا يخلينا دايمًا لبعض ضهر وسند”.
