بعد الفراق في مرحلة اسمها ” عدم الإدراك ” ، ودي بتبقى احساسك الدايم إنك هترجع زي ماعملتوا مرة واتنين قبل كده ، ورجعتوا عادي وكملتوا ..
تليها مرحلة ” اليقين ” ، ودي الفترة اللي بتعرف فيها إنه مكانش ينفع تكون مع الشخص ده ولا تبقي ضعيف كده فتنوي إنك تخرَّجه منك ..
ثم ” مقاومة الإدمان ” اللي هى عبارة عن يوم تقرب وتحاول ترجع ، وتغفر ذنب لا يغفر ، وتحاول تقنع نفسك إنك غلطان ، وإنه شبهك ، ثم تتخانق مع نفسك وتتهمها بالضعف ، ثم تحن تاني و تاااانى ترجع تلوم نفسك ..
بعدها بقى مرحلة ” أعراض الإنسحاب ” ، ودي اللي بتتعود فيها علي عزلة ، وحزن ورغبة ف الوحدة ، وعدم الإحساس بقيمة الأشياء أو الحياة بشكل عام وتبتدي تبهت .. بعدها تفاجئك مرحلة ” عودة الروح ” ؛ فتقرب للناس وتبقي إجتماعي وتشوف حاجات ماكونتش بتشوفها ف الدنيا ، وتحلم ببكره أجمل ، وتبص بعين جديدة ع الحاجات ، وده اللي هيوصلك لمرحلة
” التعافي “، وهنا مش هتكره الشخص ده ؛ بالعكس هتتمناله الخير ، وتتمنى لنفسك الخير ، وتبتدى تدور بشغف علي تجربة حقيقية مش ناقصة ، وتبقى مقبل أكتر ع الحياة